Rom 15 | JAE | STEP | Kôm teŋ gêjac aêac lau, taŋ takêŋ gêwiŋ ŋajaŋa naŋ, ŋawae gebe tamoasiŋ tauŋgeŋ atom, daôc lau palê-palê nêŋ gêŋwapac dawiŋmaŋ.

Romans 15

Tamoasiŋ tauŋgeŋ atom, tamoasiŋ lau meŋbaŋ aêacŋa êwiŋ

1 Kôm teŋ gêjac aêac lau, taŋ takêŋ gêwiŋ ŋajaŋa naŋ, ŋawae gebe tamoasiŋ tauŋgeŋ atom, daôc lau palê-palê nêŋ gêŋwapac dawiŋmaŋ. 2 Aêac samob êndêŋ-êndêŋgeŋ tamoasiŋ lau mêŋbaŋ aêac gebe damboa êsêac sa e sêmoa ŋajam, 3 gebe Kilisi kêmoasiŋ tau atom amboac tonaŋgeŋ, kêtôm teto gêc gebe “Lau taŋ sêmbu aôm naŋ, nêŋ biŋ sêmbuŋa mêŋkêpi aêgeŋ.” 4 Biŋ samob, taŋ gêmuŋgeŋ teto naŋ, teto gebe êndôŋ aêacŋa, gebe daôc gêŋwapac totêntac êpa sugeŋ ma biŋ, taŋ teto gêc naŋ, êpuc aêac tôŋ e êkêŋ aêac takêŋ mateŋ Anôtô. 5 Anôtô taŋ kêpuc amac tôŋ aôc gêŋwapac totêmtac kêpa sugeŋ ma amoa totêmtac malôgeŋ naŋ, êkêŋ amac taêm ênam nêm biŋ êpi tageŋ andaŋguc Kilisi Jesu nê Iêŋgeŋ, 6 gebe amac samob têmtac tageŋ atoc aêacnêŋ Apômtau Jesu Kilisi Tama Anôtô sa ŋa awem tageŋ.

Ŋawae ŋajam gêjac lau Juda to lau samuc ŋawae kêtômgeŋ

7 Amboac tonaŋ akôc taôm sa êtôm Kilisi tau kêkôc amac sa, gebe aŋgôm Anôtônê ŋawasi êsa. 8 Aê jasôm ŋoc biŋ tonec gebe Kilisi gêmêŋ kêtu lau Juda nêŋ sakiŋwaga gebe êwaka Anôtô sa, gebe eŋ ŋac biŋŋanôŋa ma êŋgôm biŋ, taŋ Anôtô gêjac mata gêdêŋ êsêac abeŋi naŋ, êtu anô. 9 Ma eŋ gêmêŋ kêtu sakiŋwaga gebe lau samuc tetoc Anôtô sa êtu taê walô êsêacŋa. Kêtôm teto gêc gebe

“Amboac tonaŋ aê aoc êôc aôm jamoa lau samuc ŋalêlôm,
ma jaŋga wê êpi nêm ŋaê.”
10 Ma kêsôm biŋ teŋ gêwiŋ gebe

“Amac lau samuc têmtac ŋajam êsa awiŋ ênê lau.”
11 Ma biŋ teŋ gêc gebe

“Amac lau samuc samob alambiŋ Apômtau,
ma tenteŋlatu samob sêlanem eŋ.”
12 Ma Jesaia kêsôm nê biŋ tonec gebe

“Isainê ŋawakac oc êlêc sa,
ma ŋac, taŋ mêŋêsa naŋ, oc ênam gôliŋ lau samuc,
ma lau samuc oc sêkêŋ mateŋ eŋ.”
13 Anôtô taŋ kêtu aêac takêŋ mateŋ ŋamôkê naŋ, êkêŋ amac akêŋ êwiŋ ŋajaŋa e têmtac ŋajam to biŋmalô ênam amac auc samucgeŋ, gebe Ŋalau Dabuŋ êpuc amac tôŋ ma akêŋ matem anac ŋawaegeŋ.

Paulu têtac ŋajam kêtu nê kôm jaeŋwagaŋa

14 O ŋoc lasitêwaac, aê kajaJa kêtu tôŋ gebe gabêjam gêjam nêm ŋalêlôm auc ma ajala gêŋ samob tomalageŋ ma atôm gebe alêŋ biŋ taôm ŋaŋêŋgeŋ. 15 Mago kato biŋ tonaŋ ŋalô ŋagêdô ec ŋajaŋa gêdêŋ amac, gebe japuc nêm ŋalêlôm tôŋ taêm ênam biŋ tau êtiam. Aê kato ŋalô tau gebe Anôtô kêkêŋ moasiŋ gêdêŋ aê, 16 ma kêkêŋ aê katu Kilisi Jesu nê sakiŋwaga gebe janam kôm êpi lau samuc amboac dabuŋwaga teŋ, taŋ gêjam Anôtônê ŋawae ŋajam ŋasakiŋ dabuŋ gebe Ŋalau Dabuŋ êkalem lau samuc têtu Anôtônê gêŋ e têtu da dabuŋ ênac Anôtô mataanô ŋajamŋa. 17 Kilisi Jesu gêbiŋ aê tôŋ, tec ôlic kêpi kêtu kômŋa gebe gajam kêtu Anôtôŋa. 18 Aê katêc tauc, tec jasôm biŋ teŋ atom, biŋ tageŋ, taŋ Kilisi kêkêŋ gebe jaŋgôm e lau samuc taŋeŋ wamu Anôtô naŋ. Aê gajam kôm tau ŋa biŋ to lêŋ. 19 Kilisi kêkêŋ ŋaclai gêdêŋ aê, tec gagôm gêŋtalô to gêŋsêga, ma Ŋalau Dabuŋ kêkêŋ ŋaclai gêdêŋ aê amboac tonaŋ, tec gajam mêtê Kilisinê ŋawae ŋajam tomalageŋ gajac m aŋga Jerusalem ma gajam e gaô lasê lluriki. 20 Aê têtac gêwiŋ gebe jasôm ŋawae ŋajam lasê êndêŋ lau taŋeŋsuŋ samuc Kilisinê ŋaêŋa. Aê gabe jau ŋoc demboŋ ênsac lau teŋ nêŋ alê mata atom. 21 Kêtôm teto gêc gebe

“Lau taŋ sêŋô eŋ ŋawae atom naŋ, oc sêlic eŋ,
ma lau taŋeŋsuŋ samuc naŋ, oc sêjala eŋ.”

Paulu gebe êna Rom

22 Kôm tonaŋ kêkô aê auc ŋapaŋ, tec gadêŋ amac gêwac atom. 23 Kêtôm jalageŋ gajam aoc su gabe jandêŋ amac jawac, ma galoc gajac dabiŋ ŋoc kôm aŋga gamêŋ tonec sugac. 24 Amboac tonaŋ taêc kêka gebe jalic amac êndêŋ wacjasa amacnêm gamêŋ êndêŋ taŋ gabe jana Spania naŋ. Aê jatu samuc amac ŋasawa dambê su acgom, go jakêŋ matoc gebe akêŋ aê jana gamêŋ ônê. 25 Galoc tonecgeŋ aê kasêlêŋ kapeŋ Jerusalem gebe najanam sakiŋ Anôtônê lau aŋga tônê. 26 Gôlôac dabuŋ Makedonia to Akaiaŋa sêmasaŋ kêtu tôŋ gebe sêkêŋ da ênam Anôtônê lau aŋga Jerusalem nêŋ lau ŋalêlôm sawa sa. 27 Êsêac tauŋ sêmasaŋ kêtu tôŋ ma sêgôm jagêdêŋ gebe lau Jerusalemŋa nêŋ tôp gêc êsêacŋa, gebe lau samuc sêwê kaiŋ lau Jerusalemŋa nêŋ moasiŋ ŋalêlômŋa, tec gêjac lau samuc ŋawae gebe sênam lau Jerusalem ŋa sa ŋa moasiŋ oliŋŋa. 28 Aê jakêŋ ŋanô, taŋ êsêac sejoŋ sa naŋ, êsêp lau Jerusalemŋa lemeŋ to janac dabiŋ kôm tau su acgom, go jandi jasa nêm gamêŋŋageŋ jana Spania. 29 Aê kajalagac, embe jandêŋ amac jawac, oc jawac to Kilisinê mec tolêlôm-tolêlôm.

30 O lasitêwaac, aê jateŋ amac êtu aêacnêŋ Apômtau Jesu Kilisi to êtu Ŋalau Dabuŋ nê têtac gêwiŋ aêacŋa, gebe anac siŋ awiŋ aê ma ateŋ mec êndêŋ Anôtô êtu aêŋa. 31 Ateŋ gebe ênam aê kêsi êndêŋ lau sêkêŋ- gêwiŋatomwaga, taŋ semoa Judaia naŋ, to Anôtônê lau sêlic ŋoc sakiŋ, taŋ janam aŋga Jerusalem naŋ, ênac mateŋanô ŋajam. 32 Go Anôtô embe êlôc sa, go jandêŋ amac jawac totêtac ŋajamgeŋ ma jasê aoc su jaŋgôŋ jawiŋ amac. 33 Biŋmalô ŋamôkê Anôtô êwiŋ amac samob. Biŋŋanô.